الصمت فى حرم الجمال جمال

كتبت / عزة عبد العزيز

كنت دايما اسمع الناس تقول الصمت فى حرم الجمال جمال .. بس معرفتش معنى المقولة دى الا لما دخلت هذا المكان الساحر ولقيت نفسى فعلا مش قادر انطق تلقائى وبلا مبالغة .. مكنش فى مجال للكلام كنت بتفرج وانبهر وبس

مقبرة جميلة الجميلات الملكة نفرتارى زوجة الملك رمسيس الثانى فى وادى الملكات بالاقصر .. كنت دايما كل ما اروح معبد ابو سمبل والاقى رمسيس عامل لزوجته معبد كامل مكرس لها بالجمال دا .. كنت بقعد افكر امال مقبرتها ياترى شكلها ايه .. لحد ما حالفنى الحظ من ٤ شهور ونلت شرف دخول اجمل مقبرة اثرية على وجه الارض وهى مقبرة الملكة .. ومن ٤ شهور لحد دلوقتى مش ناسى ولا هنسى ما رايته داخل هذه المقبرة المحفورة تحت الارض فى احضان الجبل . المقبرة من جمال وكمال الوانها ونقوشها المميزة تخليك تحس انك مشفتش اثار قبل كدا .. ولو واحد مش متعمق فى الاثار ممكن متصدقش ان الالوان والنقوش دى من آلاف السنين متغيرتش

.

طبعا ناس هتسال ايه الفرق بينها وبين مقابر وادى الملوك ال كل ال بيروح الاقصر بيزورها .. هرد واقول الفرق بينهم زى بالضبط الفرق بين التليفون الصينى والايفون مع طبعا فارق التشبيه وكامل الاحترام لجمال مقابر وادى الملوك واهميتها ولكن دى فاقت اى جمال لاثر شافته عنيا قبل كدا .

المقبرة دى التكت بتاعها يعتبر اغلى تكت اثرى فى مصر (٦٠٠ جنيه للمصريين و ١٢٠٠ ج للاجانب ) ولو حالفك الحظ ودفعت التكت ودخلتها مسموح لك ب ١٠ دقائق فقط داخل المقبرة ودا لان بيدخلها عدد محدد يوميا تقريبا ٥٠ فرد بس . وسعر التكت دا تم تخفيضه بعد ما كان ب ٢٠ الف جنيه واتخفض ل ١٠٠٠ ج واخيرا ل ٦٠٠ ج . وانا عن نفسى بقول ان لو حالفنى الحظ انى ادخلها تانى مش هتردد لانى انبسط وفرحت وانبهرت باكثر من المبلغ دا بكتيير . (مش هيستوعب كلامى دا الا لو حد بيحب الاثار جدا ومهتم بيها) انما لو مش مهتم بالاثار فمقابر وادى الملوك متاحة لكل الناس بتكت ٢٠ ج بس وجميلة برضو جدا وهتوفى الغرض من زيارتها .. المهم منقللش من قيمة اى اثر مهما كان يكفى انك استفدت معلومة عن مكان مهم موجود فى مصر

#مصر_التى_لا_تعرفونها

لا يتوفر وصف للصورة.
لا يتوفر وصف للصورة.

معلومة تهمك

تنبيه هام، المنشور يعبر عن رأي الكاتب ويتحمل مسؤوليته، دون ادنى مسؤولية علي الجريدة

تنبيه

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

اترك رد

لن يتم نشر عنوان بريدك الإلكتروني.

%d مدونون معجبون بهذه: