(عقلية الضحية)

بقلم/ حسام الشرقاوي
البحيرة
***** ****
عنوان غريب مش كده؟ ايه عقلية الضحية دي كمان؟ للأسف في ناس دايما شايفين نفسها الضحية,يعني ايه؟ يعني الظروف هي السبب, لا النصيب هو السبب, لا المجتمع هو السبب, لا الناس اللي حواليا هم السبب ,لا اهلي هم السبب, لا ظروفي المادية هي السبب.مش مهم ايه السبب, المهم ان دايما في سبب ان في عذر أن الشخص تعيس وحزين. قرر أنك تعيش سعيد قرر أنك تبقى منتصر ومتخليش الحياة تهزمك قبل ما تبدأ.
طول ما بنعلق سعادتنا على حاجات طول ما عمرنا ما حنحس بالسعادة. أنا سمعت كل حاجة من قراء حاسين بالتعاسة :” لو اتجوزت الشاب ده” ,” لو اخدت المنصب ده” ,”لو اشتريت العربية دي”,” لو سكنت في البيت ده” ,”لو بقى عندي فلوس” وخلافه ليه نعلق سعادتنا على عوامل خارجية؟ محدش فينا عارف مكتوب رزقه في ايه: صحة ولا جمال ولا ذكاء ولا زوج صالح ولا وظيفة ولا اصدقاء ولا ورث ولا ولاد بارين. محدش فينا بيتولد ويتقال له: ” ابسط ياعم أنت حتبقى مهندس وعندك ولد وبنت وحتجوز عن حب وحيجليك شغل وحتعيش حياة طويلة وسعيدة.”
مفيش ولا حاجة مضمونة في الدنيا :الجمال ممكن يبقى نقمة, والمال ممكن ما يسعدش صاحبه والسلطة ممكن تتعس صاحبها وعلى العكس ممكن المرض يحذرك وينقذ حياتك وممكن تسيب شغل بتحبه وتلاقي حاجة احسن عمرك ما تخيلتها.
ان احنا نقبل حياتنا ونختار نعيش سعداء مهما كانت المعطيات هو الأختيار الوحيد. احنا اللي حنعمل سعادتنا لو حررنا نفسنا من مفهوم السعادة المرتبط بالاشياء. الحياة لغز وكل يوم عندنا جزء صغير منه والصورة الكاملة مش موجودة لازم كل يوم ناخد الجزء الجديد ونركبه مع حياتنا لغاية ما الصورة تكتمل ونعرف ايه معنى حياتنا.
ماتبقاش ضحية نفسك ,قرر أنك تعيش سعيد.

معلومة تهمك

تنبيه هام، المنشور يعبر عن رأي الكاتب ويتحمل مسؤوليته، دون ادنى مسؤولية علي الجريدة

تنبيه

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

اترك رد

لن يتم نشر عنوان بريدك الإلكتروني.

%d مدونون معجبون بهذه: