علموهم قبل أن تزوجوهم

كتب / احمد عبدالعزيز
محافظه / الشرقيه

1_ علموهم إن الجواز ده حياة تانية خالص غير اللي هم كانوا عايشينها.
2_ علموهم انه مسؤلية وحياة وبيت واولاد واستقرار.
3_ علموهم انه مودة ورحمة وحب وتحمل وصبر.
4_ علموهم انه مش ورد ودباديب وكلام رومانسي وخروج وفسح بس!
لأ.. فيه كده وفيه كده. ودي بتشيل دي.
5_ علم ابنك يبقى راجل ويبقى قد المسؤولية ويشتغل ويتحمل نفقات بيته واهله.
6_ متجوزوش إلا لما يكون قادر على الكسب والمعيشة ويقدر يفتح بيت ويربي أولاد.
7_ علم ابنك ان بيته رقم واحد في حياته مش صحابه ولا القهوة وحياته بعد الجواز غير حياته قبل الجواز!
8_ علم ابنك ان بنات الناس مش لعبة ولا هي قطعة اثاث اشتراها وممكن يغيرها في أي وقت. وان دي زوجته وشريكة حياته وان مكمل معاها على طول.
9_ علم ابنك ان اللي ميرضهوش على اخته ميرضهوش على بنات الناس وكما تدين تدان.
10_ علمه برضو ان يبقى حكيم وصبور ويقدر يواجهة مشاكله بنفسه وان النساء لا تستقيم على حال وان المرأة خلقت من ضلع أعوج فإن ذهبت تقيمه كسرته وإن تركته لم يزل أعوج.
11_ علمه ان بيته أولى من الخروج والفسح مع صحابه.
12_ علمه إن أهله لهم حق عليه وواجب البر لا ينقطع وإن أمه قبل زوجته في البر وان مفيش تعارض بينهم.
13_ علمه ان يبقى راجل وميكونش شخشيخة في ايد مراته أو أهلها ويكون صاحب قرار.
14_ علمه ان يمسك نفسه عند الغضب ولا يتلفظ بالطلاق ابدا.
15_ وانتي يا حاجة علمي بنتك تبقى ست بيت كويسة وتكون زوجة قبل كل شئ.
16_ علميها معنى التودد للزوج والحب والمودة.
17_ علميها ان زوجها رقم واحد في حياتها قبل ابوها وامها.
18_ علميها ان زوجها ده أهم وأغلى حاجة في حياتها وانها لازم تحافظ عليه.
19_ علميها يعني ايه طاعة زوج وانها تسمع كلامه طالما في المعروف.
20_ علميها انها تكون هينة لينة سهلة مطيعة رقيقة حنينة.
21_ علميها ازاي تصاحب جوزها وتكون صديقة له قبل أن تكون زوجة.
22_ علميها ازاي تعمل اكل كويس.. اه هي دكتورة او مهندسة او او… على راسنا من فوق ولكن الراجل عاوز ياكل في بيته اكله حلوة ويلبس لبسة نضيفة وإلا كان قعد عند أمه أحسن..كانت بتأكله وتعمله كل حاجة بلا مقابل وبلا ضجر.
23_ علميها ان بيتها هو مملكتها وانه هو الاساس مش بيت ابوها ومش كل شوية تنط عندك وتسيب بيت جوزها.
24_ علميها لما يحصل بينهم مشكلة ان عمرها ما تسيب بيتها وتمشي وتقعد تحل مشكلتها في بيتها.
25_ علميها انها تحافظ على اسرار بيتها وجوزها حتى عنك وعن اقرب الناس ليها وان البيوت اسرار.
26_ علميها ان امه لها حق عليها من باب البر بزوجها وليس واجب وان اللي هتعمليه مع حماتك سواء خير أو شر هيترد ليكي. فقدمي لنفسك.
27_ علميها انها عمرها ما تخير جوزها يا إما أنا يا أمك. اختيار صعب جدا. لو هو بار بأهله هيختارهم ولو هو راجل خيخة هيختارها ويبيع أهله!
28_ علميها الرضا بالموجود وعدم الشكوى من حالها وانها تعيش على قد حال جوزها.
29_ علميها تبقى قنوعة وترضى بما قسمه الله لها وانها متبصش لصحباتها كل واحد ربنا ادرى بحالة.
30_ علميها ازاي تكون زوجة صالحة وان زوجها هو جنتها ونارها.
31_ وانت يا عم الحج.. علم ابنك ان خيركم خيركم لأهله.
32_ وعلمه ان السجاير والمخدرات أخرتهم خراب البيوت.
33_ علمه انه لازم يبقى مالي عين زوجته ومكفيها من كل حاجة! علشان متبصش بره.!
34_ علمه كمان ان السعيد هو السعيد في بيته وإن أشقاه كل الناس فلا تبحث عنها خارج البيت.
35_ علموهم ان الجواز مش لعبة ولا تهريج! ولا تجربة وخلاص.
36_ علموهم ان فيه آخرة وموت ولازم يكون ليهم هدف وان الحياة مش اكل وشرب ولهو وخلاص.
37_ علمي بنتك ازاي تكسب حماتها من اول يوم، مش ازاي تعاديها وملكيش دعوة بيها!
38_ علميها انها تعاملها زي ما تحبي مرات ابنك تعاملك.
39_ علميها تحترم الصغير قبل الكبير علشان يقولوا يسلم البيت اللي طلعت منه.
40_ علموهم كيف يبنون بيوتا تخرج رجالا ونساءا على قدر المسؤولية ويحملوا هم هذا الدين وأن ينجبوا عظماء كما كان الصحابة والسلف قبلهم.

معلومة تهمك

تنبيه هام، المنشور يعبر عن رأي الكاتب ويتحمل مسؤوليته، دون ادنى مسؤولية علي الجريدة

تنبيه

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

اترك رد

لن يتم نشر عنوان بريدك الإلكتروني.

%d مدونون معجبون بهذه: