مقال بعنوان المعاناة والتحديات

155

معلومة تهمك

بقلم/كاترين عبد المسيح عدلي

العيال بيفضحوني و احنا في السوبر ماركت
ابني مبيسمعش الكلام و بيطنش لما بنادي عليه
بنتي مش مركزة و بطلب الحاجة منها اكتر من مرة
العيال بيكسفوني لما يكون عندي ضيوف

كتير من الولاد الحركيين اللي عندهم شقاوة زايدة للأسف بيتعرضوا للتنمر او بيتشخصوا بالخطأ انهم اضطراب فرط حركة و بياخدوا أدوية بلا داعي بسبب عدم وعي الأهل و قلة مهاراتهم التربوية في التعامل معاهم وخصوصا لو كان الولد ده مختلف في طباعه عن بقية اخواته، و في الحالة دي اللي بيمارس التنمر الاهل نفسهم و يبدأوا يقولوله انت متعب، مش متربي، قليل الادب

معلومة تهمك

** ازاي اعرف ان ابني عنده اضطراب فرط حركة مش مجرد شقاوة عادية؟

– مبيقعدش في مكانه ،، ولو قعد بيفرك و يهز في رجله او جسمه، ميطقش الانتظار، بيقاطع اللي حواليه ، و لو حد بيسأل يجاوب قبل ما اللي قدامه يكمل سؤاله، مبيعرفش يصبر ولا يرفع ايده لحد ما المدرس يقوله اتكلم ، لو عايز يدخل الحمام ممكن يفتح علي اللي جوه مبيصبرش او ممكن يقلع البنطلون ع الباب قبل ما يدخل الحمام،، وعلى العموم مبيبطلش كلام، مبيفصلش و مبيفرهدش وغالبا معظم اللي حواليه هم اللي بيفرهضوا و ده بيبان اكتر في آخر اليوم لما ينام فترة قليلة مش مناسبة لمجهوده طول اليوم

– مندفع في حركته و غالبا بتكون بلا هدف و بتعرضه هو واللي حواليه لاصابات زي الجروح و الكسور لانه بيقع و بيتخبط كتير، يمكن بشكل يومي او اسبوعي علي الأكثر،، ده غير أنه بيكون عنيف في لعبه مع زمايله وممكن يتسبب في اصابتهم بشكل متكرر وغالبا غير مقصود ، و طريقة لعبه عنيفة يقطع أي ورق يقابله و يكسر أي حاجة تيجي في ايده و يطلع كل حاجة من مكانها و يحطها في حتت تانية، وغالبا السلوك ده مش مجرد سلوك طبيعة المرحلة

– ضعيف التركيز في اكتر من مكان و في اكتر من جانب ، يعني مش بس في الدراسة ده حتى في الامور العادية اليومية في البيت او حتى في أوقات الترفيه و اللعب، و عشان كده بينسى حاجاته المهمة بشكل متكرر، و بيكون عنده صعوبة في تنفيذ اي طلبات منه مهما كانت بسيطة كأنه مسمعهاش اصلا

** أرجوكم كفاية تنمر من الأهل و من المدرسة للولاد دول لأنهم زيهم زيكم و يمكن أحسن والله، كفاية إني أقولكم ان بيل غيتس رجل الاعمال الامريكي عنده اضطراب فرط حركة

** نتصرف ازاي لو شقاوة ؟

_ لو مجرد شقاوة زايدة ومش اضطراب فرط حركة…. محتاجين نبقى جدعان و اد مسئولية التربية ونطلع الطفل اللي جوانا و نلعب مع عيالنا و نخليهم يمارسوا رياضة و يخرجوا في أماكن مفتوحة و يبقى لنا وقت معاهم بعيد عن الزفت الموبايل او الهباب التلفزيون، و أبوس ايديكم نقلل السكريات و المواد الحافظة مش لأنها بتجيب اضطراب فرط الحركة بس لأنها بتعفرت و تهيبر حتى لو العيال اصلا هادية

** نتصرف ازاي لو فرط حركة و نقص تركيز ؟

_ ضروري التوجه لمتخصص عشان الولد يتدرب بتمارين عملية علي زيادة تركيز و تنمية مهارات و تظبيط اللغة لو فيه أي صعوبات او تأخر و مفيش حاجة اسمها الأدوية فيها إدمان و هتؤذيه اكتر و هتضر المخ لأن دي خرافات مش حقيقية، و لازم نعمل اختبار كونرز و بعض التدريبات الذهنية و التمارين الحركية، بالإضافة إلى اتباع الإرشادات اللي منها تظبيط مواعيد النوم و الصحيان،، و نساعده يمارس رياضة يخرج فيها طاقته الحركية و نظبط له التغذية و نركز على اوميجا 3 و 6 و 9 ( مكسرات، زبيب، قراصيه،. مشمشية ، كوسه، قرع عسل)

** نيجي بقى لدور المدرسة،، محتاجين نعمل فصل بدون كراسي و العيال تبقى على راحتها و منعرضهمش للنقد و نحترم طبيعتهم الحركية ، و نختار أسلوب تفاعلي حركي

** الطفل الحركي محتاج مدرس حركي ومحتاج مدرب حركي

بدل ما نركز علي اللي ناقصهم بصورة سلبية… نشجعهم باللي متميزين فيه عشان يبقوا أحسن

قوموا احضنوا أولادكم

معلومة تهمك

معلومة تهمك

%d مدونون معجبون بهذه: