الصيف والصيد و الطعم

شعر / محمد مصطفى امين

فكرتينى بسمكة جميلة

كنت صايدها

كنت ساعتها في ثانية إعدادي

لابس شورت و جزمة كاوتش

و كنت بحب الصيد و الطعم

و كنت بموت في أجازة الصيف

علشان أجرى و أطير على الريف

و أعمل سنارة من البوص

و أفحت في الارض أجيب دود

و أقعد من النجمة على الترعه

أغني و أصفر و أشرب شاي

و آكل لقمه وجبنه قريش

كنت ساعتها في غاية المتعه

زي ما أكون في اللحظه دى هي

بس عشان ما أنا كنت بَروَّح

شكلي ملخبط متعاص طين

امي كانت بتزعقلي

و تهددني إننا هنسافر

كنت بعاند بس بخوف

و لأول مره بعد 23 شتاء

راجع أحس بنفس الشيء

وإنت معايا

لقيت الصيف والصيد والطعم

لقيت غنايا وشايي

وعيش من نفس الطعم

حسيت بالفرحه و بالخوف

حسيت بالتهديد من أمي

الله يرحمها.