أطفال العالم باعتين جوابات.. كلمات: الشاعرة إيمان أحمد يوسف

0 58

معلومة تهمك

 

أطفال العالم باعتين جوابات
لسة الحمام من غير جناحات
وازاي راح توصل شكاويهَم
ودموع الأحزان في عنيهم
أحجار ف أيديهم تتكلم
وقلوبهم لسه بتتعلم
كلمة أمان
من حقهم يلقوا الحياة
من غير حروب
من غير آلام
أو اختلاف وجهات نظر
بالبندقية والصاروخ
من غير عدالة
أو تفاهم أو كلام
تاه السلام ولسه مش لاقي الوطن
ليه يابشر الشر حاكم أرضكم
والحزن ناهش عرضكم
الخوف شريعة ف حضنكم
بالدم ليه ترووا الثمار
بينكوا وبين الأرض تار
بدل السلام حل الدمار
ولسه نهر المر جاري ع البلاد
ولسه قلب الخير ماهوش قادر يدادي ف العناد
تاه السلام ولسه مش لاقي الوطن
أطفال العالم شهدا ومصابين
بيقولوا إيه ذنب المدنيين
حكام ف آرائهم مختلفين
الورد قنابل والفل بنادق
والبحر خنادق للبني آدمين
شعارات تتظاهر
قرارات تتآمر
وإحنا بنتفرج مندهشين
بنشارك وإحنا مش مقتنعين
بإن ده شكل الحياه
وأن أرواحنا الثمن
تاه السلام ولسه مش لاقي الوطن
اطفال العالم باعتين جوابات
بيقولوا القلب الطيب مات
مشوارنا م الأصعب للصعب
مفروش الأسفلت من الرعب
وإزاي راح نوصل برصاص وسكات
تاه السلام وتاهت معاه كل الجوابات
الشاعرة ايمان احمد يوسف

معلومة تهمك

معلومة تهمك

معلومة تهمك

شاركنا برأيك وأضف تعليقك

%d مدونون معجبون بهذه: