قصيدة الأيام 

0 2

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

قصيدة الأيام

متابعة عبدالله القطاري من تونس

 

قال الشاعر بشير امحمد شيحه

معلومة تهمك

الله يرحمه

 

ليام ياللي ناشدين عليهم

خفيات غير الله يعلم بيهم

 

فكان الرد للشاعر أمين امحمد شيحه رحمة الله عليه حيث قال مخاطب اخيه الأكبر بشير

 

هالبيت خوذ جوابه

وليام زي السوق للجلابه

مرات يبدوا ربح فوق حسابه

بايع وشاري ماليات ايديهم

ومرات يبدوا كاسدات غضابه

بلا قبض غير ايخسروا شاريهم

ومرات يبدوا زاهيات طرابه

ومرات يبكوا ضيم صار عليهم

 

خفيات على جاهلهم

وربك بيعلم سرهم وعملهم

وهو الخالق بحرهم وجبلهم

وخالق قمر وشمس ولياليهم

ويتبدلوا كيف مابغي يبدلهم

وكاتبلهم زي ماكتب يبغيهم

فيهم ايبانوا الناس بفعايلهم

امتحان من ربك يمر عليهم

فيه ناس فاحسن معرفه وصلهم

كرامات ياشاعر فتح عليهم

وفيه ناس ضلوا وجهلهم ضللهم

مشوا فى ظلام مكتفات ايديهم

 

يعلم بكل خفيه

يسجل علينا فى الخطا والسيه

ويعلم قلوب الصادقين النيه

كان يصبروا يوم الجزاء يجازيهم

ولرواح عنده ظالمه وبريه

ويميتهم يوم بعثهم يحييهم

 

مانعلموش بداهم

ولانعرفوا شن مرضهم ودواهم

ولا نعلموا شن جايبات معاهم

لا الباهيه وشنهي الرديه فيهم

وربك خلق الناس ماساواهم

بعمارهم والرزق يتوليهم

 

ليام هكي ديمه

مره مطر مرات ريح بغيمه

ومرات يلفوا بضحك والتبسيمه

ومرات يبكوا دمعهم غاطيهم

وقداش رفعوا من رجال عظيمه

التاريخ يحكي والزمان عليهم

ومايفيدهمش الكدر والتخميمه

يبغوا شديد العزم ويواسيهم

 

ليام همه همه

مره ربيع وزرع مره زمه

وقداش فيهم من رقي للقمه

عكسوه ولا تحت من رجليهم

وقداش من قزون عاش بلا امه

تكون أولا راس ماله فيهم

وقداش فيهم من جري فى دمه

غريب عاش وقطع اتصاله بيهم

 

ماينعدوا

يجيبوا القديمه والجديد ايجدوا

كانوا عرب يقرسوا ويهدوا

وكانوا نزالي زهوة اللي يجيهم

هاذوك وين.اوين وادي غدوا

قرع اليتيم كان يملا فيهم

وهالوقت جفوا مجالبه وانسدوا

صبحوا كواتر رملهم غازيهم

وليام ديمه يبعدوا ويمدوا

تقولش مشوا ماعاد بنلاقيهم

يعود زهوهم لول قداك يردوا

مريض 15 عام يبرى فيهم

 

لايبعدوا لايغيبوا

لاييبسوا لايقدموا لايطيبوا

لايكملوا لايكبروا لايشيبوا

لاكان مرضوا الصبر بيداويهم

وساعات يبدوا يلمدوا ويجيبوا

امنين يرفعوا منك قوي واريهم

 

ليام رده برده

وليام مره خير مره شده

يدوروا مدار القلب تحت العدة

وساعات من عمرك اتفوت فيهم

ومايدوم حال وكل شي يتعده

تصبرلهم والا سوا تبكيهم

 

لاتذم لاتشكرهم

وربك خلق الكون ويسيرهم

قادر يغير ريحهم بمطرهم

يخلق ايصور كل حاجه فيهم

ويعلم قلوب الناس وضمايرهم

وهو غني كانه نوي يغنيهم

وإللي طرابه ففرحهم حيرهم

بعد الطرب مكتوب بيبكيهم

ومطول ثنيتهم بعيد سفرهم

وليام لايعادوك لاتعاديهم

وعبي عيونك صبر فى غرايرهم

وشد العزايم كان بتحاذيهم

 

دالة بدالة

كما الريح مابين الجبل وشماله

مرات زي التمر للوكاله

ومرات حنضل مر ماتعديهم

خيارك ابنادم باهيات افعاله

كان مات للحيين يحكوا بيهم

وليام فيهم تعرف الرجاله

ويبان مولى الطرف وافى فيهم

وإلي قصير وبايدات احباله

الناس بالعطش اتموت مايحييهم

 

مامن اجيال فنوها

وما من قصور مشيده بادوها

ومامن كراسى عاليه واطوها

ومامن مناهل ردمهم غاطيهم

مش دايمه دار الفنا سموها

الدنيا أمتاع ايام تقضي فيهم

إللي مشت ماعاد بيردوها

والقافيات الله يعلم بيهم

والميته ماعاد بيردوها

أما المريضه اتنوض تمشي فيهم

 

مش دايمات لوالي

مايدوم غير وجه الكريم العالي

قداش خلوا من غني زوالي

وقداش من طايح تعلى فيهم

وقداش ماردوا غريب وجالي

وقداش بكوا عيون عل غاليهم

 

ليام زي الواري

كما الطقس يبرم ظاهري وجفاري

مره جنوبى مرتفع وحراري

ومره شمالي والبروده فيهم

ولو كان ترقى الفوق بالطياري

وتنزل سطوح القمر وتناجيهم

وتعمل بواخر فوق من لبحاري

وتجول فى العالم اتاجر بيهم

وتعمل مغايز ذهب بالمعياري

وتعمل خزاين مال تملا فيهم

وتعمل مباني عاليه لدواري

وقداش مانقرش سطاهم فيهم

وتعمل مزارع حافله بلشجاري

وتعمل حظاير للدواجن فيهم

يجي يوم ياتي لجل باذن الباري

ويرموا عليك اللحد وتخليهم

 

مكتوب من لمهادي

فوق الجبين العمر بالعدادي

كل حد لما تربته بتنادي

مخلوق مايقدر يغير فيهم

ولازم تراب القبر والألحادي

راهو جميع الناس تبغي تجيهم

ونختم كلامي بالصلاة على الهادي

العوسات يوم الحشر يشفع فيهم

 

وقتلك على ليام واللي فيهم

وهي هات ياشاعر وزيد عليهم

منقول عن صفحة شعراء الصيعان

معلومة تهمك

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

اترك رد

لن يتم نشر عنوان بريدك الإلكتروني.