قوة تحمل النساء وجع وألم الولادة القيصرية ومابعدها من ألم

الولادة القيصرية

0 7

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

قوة تحمل النساء وجع والم الولادة القيصرية وما بعدها من الم

بقلم .. عماد عبد العظيم

الولادة القيصرية من اصعب العمليات حرفيا . دي اصلا عالميا متصنفة من أخطر العمليات اللي تؤدي للوفاة.

معلومة تهمك

حضرتك بتستهين ب الولادة القيصري علي اساس انها بدون ألم والستات مش بتتعب فيها زي الولادة الطبيعية.

طيب احب افاجيء حضرتك واسالك .. عارف يعني ايه حقنه بنج نصفي في النخاع الشوكي ؟! عارف ألمها عامل ازاي ؟ عارف لو اتحركت حركة بسيطة ممكن تجيبلك شلل؟ او عالاقل تحس بكهربا في جسمك كله كأنك اتوصلت ب صاعق كهربا.

طيب عارف يعني ايه فتح سبع طبقات بطن.. كل طبقة منهم سميكة بتترفع زي المرتبة كدة .. سبع طبقات تتفتح عشان يوصل للقرار المكين اللي جواه البيبي.

طيب سمعت حضرتك عن الألم اللي بتحسه الأم اول ما تفوق من البنج سواء النصفي او الكلي وتبدأ تحس بوجع وألم لا يحتمل لان كل طبقات بطنها مفتوحة
الدكتور مجرد بيخيط الطبقه الخارجية ..لكن كل الطبقات اللي جوا مبتتخيطش بتفضل مفتوحة تلم بقي مع نفسها بالوقت .

طيب جربت حضرتك تكون كل طبقات بطنك مفتوحة كدة وبتتألم وتيجي ممرضة تضغط بكل قوتها علي بطنك . زي ما الحوض بيتسد وتخبطه ب ايدك كدة عشان يتصفي.. هي تقعد تخبط كدة عشان بواقي الدم ينزل ؟؟؟!! متخيل الألم..

تعرف حضرتك ايه عن وسط كل احساسك ده يحطو بيبي علي ايدك يلا رضعه!!

طب تعرف ايه عن الاحساس اللي بتحسه الأم بعد كل ده مباشرة لما يقولولها لازم تتمشي في طرقة المستشفي عشان الجرح ؟ قادر تتخيل يعني ايه بطن مفتوحة ولازم تمشي علي رجلك قادر تستوعب العياط والالم اللي مع كل خطوة ..

تعرف ايه انت عن البنج الكلي اللي بيسبب كحة وما أدراك يعني ايه كحة ولا عطسة وبطن مفتوحة .

تعرف ايه سيادتك عن ان قبل ما تكمل ٢٤ ساعه علي كل ده بيدولك بيبي تروح بيه يسهرك طول الليل عياط وصريخ وانت مش فاهم ايه اللي بيحصل اصلا ولا عارف تلاحقها من وجع القيصري اللي لا يحتمل ولا من صريخ الطفل.. اللي بيفضل شهور مخليك لا تعرف تنام ولا تاكل ولا تشرب .

جربت حضرتك وجع البنج النصفي وتأثيره بالسنين علي ان الضهر تحس فيه بألم؟ ورغم كدة تشيل طفلك ال ٢٤ ساعه !

جربت سيادتك صداع البنج النصفي اللي بيستمر اسبوع تقريبا بعد الولادة .. كأن حرفيا بدون مبالغة حد ماسك هون بيخبط بيه جوا دماغك .. دماغك من جوا بتترج حرفيا وعينيك مش قادر تفتحها
انا كنت بحط ابنى علي صدري يرضع ومش قادرة اوطي دماغي ولا افتح عينيا اشوف اصلا بيرضع ولا لا .. كنت بقول لماما شوفي انا مش قادرة احرك راسي

لو الممرضة مسئولة حقنة المسكن اتأخرت كنت بموت من ألم الصداع .. وسط كل ده في بيبي قد ما ايدك عايز معاملةخاصة في القلع واللبس والحما و الرضاعه والبامبرز.. كل ده وانت مفوقتش اصلا من عملية مفتوح فيها بطنك
جربت حضرتك تعيط بسبب ألم الرضاعه وان النابلز بتاعة صدرك تموتك من الألم وتنزل دم وكأنها بتتدبح وبرضه لازم ترضع ؟!

تعرف ايه عن لو ربنا أراد تحمل تاني فجأة ف تفتح قيصري تاني بعدها ب سنة او سنتين و تالت و انت لسة مفوقتش من ألم القيصري الاول اصلا

تعرف ايه انت عن قوة الستات في تحملها الألم  القيصري عشان تقلل منه وتحس ان القيصري سهلة ؟!
جربت ايه حضرتك مؤلم في الحياة اصلا يعادل الألم اللي انا كتبته ؟!

ايه بطولاتك في تحمل الألم اصلا مقارنة ب نص ألم القيصري؟
وفي الاخر يقولك دي سوسته بتتفتح و تتقفل تاني ..

معلومة تهمك

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

اترك رد

لن يتم نشر عنوان بريدك الإلكتروني.