ياخســــــارة يــــــابلد

شكسبير والضمير

0 5

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

(((( ياخســــــارة يــــــابلد ))))
*************************
بقلم / محمود جنــــيدى


شكسبير والضمير
ـــــــــــــــــــــــــــــ
شكسبير كان بيقول :
نحن بحاجة للخلافات ، لمعرفة ما يخفيه الآخرون فى قلوبهم ..
فقد تجد مايجعلك فى ذهول ..
وقد تجد ماتنحنى له احتراما ” ..
والله ممكن فعلا .!!.
وبعدين احنا مضطرين نصدقه ، لأنه كان “رايق” ، ومخه كان نضيف عن مخنا ، وكان أعقل مننا .!!.
إحنا خلاص فيوزاتنا ضربت كلها..
لا ميّة نضيفة .. ولا كهربا مظبوطة.. ولا دكتور عنده ضمير ..
على فكرة أنا نسيت معنى الكلمة دى .. كلمة الضمير .!!.
هو يعنى إيه ضمير صحيح .؟؟.
يارب ألاقى حد فاكر معناها بجد ..
هو احنا بقينا كده صحيح .؟.
نسينا يعنى إيه ضمير .؟؟.
طب ليه .؟. ليه إحنا بقينا كده .؟. سمحنا لنفسنا نبقى كده ليه .؟. هانت علينا نفسنا ليه .؟.
لأ .. ليه رضينا بإهانة نفسنا .؟؟.
أيوة دى إهانة .. والله العظيم إهانة وإهانة كبيرة جدا جدا جدا .!!.
ماهو أما أسمح لنفسى بالإنحدار أو الإنزلاق فى منحدرات مشينة ، أو منزلقات موبوءة ، معناها إنى أهنت نفسى .. أما أسمح لرجلى بالمشى فى الطين والوحل .. أما أمد إيدى وآخد شئ مش من حقى ..
أما أكسر حاجز الإحترام بينى وبين تلميذى عشان بياخد عندى درس خصوصى .. أما أسمح لساعى مكتبى ينادينى بإسمى عشان بيجيبلى ” مهاميز ” من العملا .. أما أسمح للتومرجى بتاعى بالإستظراف ويقوللى ” صبّح يادكترة ” عشان عارف أنا باعمل إيه مع المرضى ..
أما وأما وأما .. أبقى فعلا أنا أهنت نفسى .. أما أكسر عينى ومقدرش أفتحها قدام فلان أو علان .. أبقى أهنت نفسى .!!.
أما تختلف شخصيتى قدّام زوجتى وأولادى فى البيت عن شخصيتى قدام الناس خارج البيت ، تبقى منتهى الإهانة ..
أخلاقيّات ؟؟؟؟؟؟؟
ليه أقابلك وانا مكشّر أو انت تقابلنى وانت مكشّر .؟. ليه .؟. ليّا عندك إيه أو لك عندى إيه .؟.
ده مجرد ابتسامك فى وجه أخيك “صدقة” ..
تخيل .. مجرد ابتسامة .. ابتساااامة .. مش حتخسر حاجة والله .. يادوب تفرد وشك شوية وتفتح شفايفك عن بعض أو بلاش ياسيدىتفتحهم .. ابتسم وهما مقفولين ..
طب اقولك حاجة: أقف قدام مرايتك كده الصبح قبل متنزل من بيتك وبص مرتين فى المراية : مرة وانت مكشّر ، ومرة وانت مبتسم .. شوف انت حيعجبك مين فى الإتنين : المكشر والا المبتسم .. ومتنساش إن الإتنين اللى انت شفتهم دول هما إنت .. آه والله إنت .!!.
طب تخيل الناس بقى ..
تخيل لو حد ضحك عليك وغشك فى أى حاجة ، حتعمل إيه ..
طب انت بتغش الناس ليه .؟.
ياعم الدكتور .. يا “ملاك الرحمة” .. يا إنساااااان .. أيها المخلوق من ” ماء مهين ” .!!. تماما كغيرك من بنى البشر ..
ياأخى دانا ماباجيش لحضرتك إلا وأنا فى أشد حالات ضعفى .. مريض ..
حضرتك مفكرتش فى المعنى الإنسانى لحضورى لحضرتك وأنا مريض ضعيف بالشكل ده .؟؟.
أنا جايلك يادكتور عشان تاخد بإييدى .. تعالجنى .. تبعد عنى المرض .. تساعدنى على الألم .. تشيل الوجع اللى فى جسمى .. ترجعلى اللى خده منى المرض ..
حتعمل كل ده بالعلم اللى ربنا اداهولك .. مش هو ربنا برضه اللى منحك العقل ده وهيأك لتتلقى هذا العلم .؟. وربما اختصك عن غيرك بيه عشان تنفع الناس بيه ؟؟
طب ماهو ربنا قادر يمسح مخك فى أقل من لحظة ، ومتلاقيش العلم ده فى ذاكرتك ..
طب بلاش كده .. مش كان ممكن يكون الوضع معكوس ، أنا الدكتور وانت المريض .؟؟. كنت حتقول عليا إيه وقتها .. مفترى ؟؟ معنديش رحمة ؟ معنديش ضمير ؟
إيه رأيك ؟؟
ياعمنا المدرس .. سنة تالتة اعدادى وثانوى مابيروحوش المدرسة ليه .؟؟. بتدوهم دروس الصبح ازاى وليه ؟؟ عملتوا المدارس مراكز دروس خصوصية ليه .؟؟.
لله درّك ياشكسبير ..
ياعم شكسبير .. لو رجعت النهارده حتقول إيه والا إيه .؟؟.
لم تعد الخلافات بين بعضنا البعض وفقط .. أصبحت الخلافات فينا .. فى داخلنا ..
الخلافات زادت وفاقت كل الحدود .. لكنها للأسف خلافات فينا ( مننا فينا ) الشخص الوحد أصبح يختلف مع نفسه .!!. أصبح عدة أشخاص فى جسد واحد .. ولذلك راجت سلعة ” الطب النفسى ” . بعد أن أصابنا ” العته ” بفعل فاعل ..
ياعم شكسبير لورجعت تانى حتكره نفسك ، لأنك وافقت ترجع فى عصر ملئ بالإختراعات والإبتكارات ، لكن أهله تخلّفوا عقليا حين باعوا ضمائرهم وهانت عليهم أنفسهم ..
ياعم شكسبير نحن قوم نسوا أبسط خصائصهم .. نسوا أنهم بشر .!!.
ياعم شكسبير .. سامحنى لأنى كتبت بالعامية وتركت الفصحى .. لكنى مافعلت هذا إلا لرغبتى فى جعلها ” فضفضة ” أو مواجهة مع النفس ..
ياعم شكسبير من فضلك .. قول معايا الله يخليك
يااااا ألف مليون خسارةيابلد ..

معلومة تهمك

معلومة تهمك

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

اترك رد

لن يتم نشر عنوان بريدك الإلكتروني.

%d مدونون معجبون بهذه: