شمسكوا مالهاش أفول

(((( شمسكوا مالهاش أفول ))))


كتبها / محمود جنيدى


تمنتاشر سنة النهـــارده بالتمـــام والكمـــــال ..
مرّوا كما السنين العجــــاف يا أغلى الرّجــال ..
حتى السنبلات الخضر جفّوا لما الفراق طـال ..
حتى الكلام خلص ومش لاقى كلام ينتقال


تمنتاشر سنة ومن قبلك راحت الغالية ..
وبعدكم راح مصطفى وأمى وفضيت الدنيا ..
كنتوا السند والشموع اللى بتنوّر ..
بس كنت السكر اللى يحلّى أى مر ف ثانية ..


صدقنى لا أسماءكوا ولا صوركوا م القلوب بتروح ..
ودمع العيون لا بيطفى النار ولا بيداوى الجروح ..
والآهات مالية القلب بس لا باشكى ولا حتى أبوح ..
لكن مصبرنى ان لكم فى الجنة قصور وصروح ..


سنينى العجاف طالت يا”يوسف” الحقنى بتأويلك ..
غيتنى يا يوسف وابعتلى قميصك والاّ منديلك ..
وحشونى والله وربنا عالم قد ايه وحشونى ..
خلينى مرة أشوفهم وانا والله حادعيلك ..


ياغالى ياللى بيفتكروك النهارده ،
انا فاكرك على طول ..
فاكركوا ف كل لحظة وشمسكوا ف قلبى مالهاش أفول ..
بس زى ماسبتونى وحدانى بعدكم متنسونيش من دعاكم ..
واشفعولى عند ربنا ، يمكن بدعاكم أنول القبول ..


تحريرا فى ١٣ يونيو ٢٠٢١

معلومة تهمك

تنبيه هام، المنشور يعبر عن رأي الكاتب ويتحمل مسؤوليته، دون ادنى مسؤولية علي الجريدة

تنبيه

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

اترك رد

لن يتم نشر عنوان بريدك الإلكتروني.

%d مدونون معجبون بهذه: