الخل الوفى 

معلومة تهمك

 

 

بقلم : محمود جنيدى
هذا النوع من الخلان موجود فعلا وبجد ..
وموجود بكثرة كمان صدقونى .!!.
بس عارفين المشكلة فين .؟.
مش فى وجوده أو عدم وجوده أبدا ، لا لا لا لا ..
المشكلة فينا احنا .!!. أيوة فينا ، تخيلوا ..
ياعينى من كتر مااتصدمنا ، ومن كتر مانزل على دماغنا من طوب ودبش وبلاوى من الناس ، ركبنا وسواس قذر ، خلانا نخاف من كل الناس .!!. أفقدنا الثقة فى كل الناس .. خلى نضاراتنا شبه سودا ، أو سودا فعلا ..
واحنا معذورين على فكرة ..
ماحنا بشر برضه .. يعنى ألاقى الخبطات دى كلها نازلة فوقى ومخافش .؟؟.
طب ازاى .؟.
اللى اقوله ازيك ، يقولى ليه ..
اللى اقوله وحشتنى يقولى بكام .!!.
كله بقى محتاج مقابل ..
مفيش حاجة بالمحبة ولا بالأخوة ولا بالإنسانية ..
لأنه أصلا المحبة والأخوة والإنسانية شبه انقرضوا .!!.
وعارفين انقرضوا ليه .؟؟. لأننا فرطنا فيهم وماتمسكناش بيهم ..
نسينا ان دول هما الرصيد اللى حيتبقالنا نعيش بيه عمرنا اللى لسة جاى واللى لسة معشناهوش ..
نسينا اننا أضعف من الضعف نفسه .. وإننا زى الشجرة ، أقل شوية ريح ممكن يقلعونا من الأرض وطيرونا ..
نسينا حاجات كتييييير جدا جدا ..أقلها إننا بشر .!!. وأكبرها : إننا بشر برضه ..
يااااااه ..
فتحت موضوع إسمه “وجع القلوب” .. وللأسف .. كلنا ، وبلا استثناء ، موجوعين منه ..
بس الجميل اللى مفروض نتمسك بيه كلنا ، وبلا استثناء برضه ، اننا أكيد فى لحظة صفا ، والله والله والله ، حنلاقى المدعو “الخل الوفى”..
ماهو للأسف احنا مبنعرفش نتخلى.!!. عشان احنا بنحب من قلبنا ، مبنعرفش نكره ، لأن الكره مش موجود أصلا فى قاموسنا ..
احنا شفايفنا دايما مبتسمة ..
قلوبنا دايما مفتوحة ، بترحب بالكل ..
هما للأسف ..
جواهم غل وحقد وحسد وكره ..
ومن غيييير سبب .!!.
لنا الله ..
عفوا سامحونى أنى كتبت باللهجة العامية ولم أكتب بالفصحى كما تعودت ..
ذلك أن الموضوع حكم بهذا ..
حسيت انى عايز اتكلم معاكم وكأنى قاعد معاكم بندردش أو بنفضفض كلنا ..
وجع قلب ..


١٦ أكتوبر ٢٠٢١

معلومة تهمك

تنبيه هام، المنشور يعبر عن رأي الكاتب ويتحمل مسؤوليته، دون ادنى مسؤولية علي الجريدة

تنبيه

احصل على تحديثات في الوقت الفعلي مباشرة على جهازك ، اشترك الآن.

معلومة تهمك

اترك رد

لن يتم نشر عنوان بريدك الإلكتروني.

%d مدونون معجبون بهذه: