مش مسموحلك
شعر /محمود فتحي
بحاول اطلع منك
تفاصيل الجرح
اللي بيجري في لحمي ودمك
وافهملك
وادقلك فتافيت الحزن
طعمك
و زبد البحر المتعكر برغاوي الحزن
دمعك
وألمسلك ضي القمر الفارش، في الطرقات
دوبان التلج ف قلبك
وافتحلك كل دروب الليل
مس مسموحلك
واتاكد اني
طالع من آخر فقره في ضهرك
واجمعلك
كل رمال الشط المبدوره ف حجرك
وتاكد
ان الصوره على الحيطه المكسورة
صورتك
والخرز الملضوم في العقد
المدلي علي صدرك
وطبيعي انه يلامس جلدك
ومحيط البرواز قزاز
بيحاصر كل مشاعرك
ويأكد سجنك – – جوه عشقك
وانا ناوي اخلع نفسي منك
واخرج من تحت ضوافرك
واستودع قلبك
واختملك كل جوازات العشق مرور
لكن – – مش مسموحلك-