كفتة رز وممبار
مقدم من شيف : ايمان فوزي .. مصر
حبيباتي ده فطار النهاردة وينفع للأعياد كمان عملت ممبار وكفتة رز مع لحمة مكعبات .
مكونات الوصفة :
– ممبار
-خضرة محشي
-كزيرة خضرا
-بقدونس
-شبت
-طماطم
-بصل
-رز
-ملح
-فلفل اسود
-كمون
مكونات الكفتة :
– لحمة مفرومة
-لحمة مكعبات للشوربة
-رز مطحون
-خصرة محشي
-بقدونس
-شبت
-ثوم
-طماطم
-بصل
التحضير : ساعة
مدة الطهي : نصف ساعة
الطريقة :
الممبار بيتنضف كويس جدااا ويتغسل بالملح ويتقلب 💙
نجهز الخلطة طماطم مكعبات وخضرة محشي بقدونس وكزبرة وشبت ونعناع أخضر أو ناشف زي ماتحبي وبصل مبشور المهم بيتخلط على بعضه والتوابل توم بودر وبصل بودر وجنزبيل وملح وفلفل أسود وكمون وزيت ذره اغسل الرز واقلب كويس جدا و ابتدى احشي💙
في إناء به ماء اتبله ملح وفلفل أسود وتوم بودر وبصل بودر وجنزبيل مطحون واسيبه يغلي و ابتدى أنزل الممبار أنا بمسك الطرفين واللفهم زي البونبون وانزله في الإناء لحد مايستوي و ابتدى اطلعه واحمره في زيت ذرة 💙
طريقة كفتة الرز :
كفتة الرز في المفرمة أضع الخضرة بعد غسيلها كويس جدا كزبرة بقدونس شبث وبصل وتوم ينزلوا من المفرمة اضيفهم على اللحمة المفرومة والرز المطحون واقلب كويس جدا أنا عملت كيلو ونص لحمة عليهم كيلو رز مطحون وممكن تقللي شوية 💙
المهم بنزل الخليط مرة ثانية في المفرمة وبعدين وش كمان على الضيق مرة ثانية بينزل الخليط ناعم 💙 أتبل ملح وفلفل وسنة كمون وكربوناته وجنزبيل مطحون وتوم بودر وبصل بودر وتقلب كويس واصبع الكفتة واقليها في زيت ذرة
واول ماتبرد اشيلها في أكياس في الفريزر وساعة التحضير اجيب رأس توم كبيرة أو ملعقتين توم من اللي مخزنينه في الفريزر واحمرهم في زيت ذرة وانزل بعصير الطماطم وأتبل ملح وفلفل أسود واسيبها تدخل في تسبيك💙
بكون سلقة لحمة بحمرها وانزلها على التسبيكة للكفتة وانزل الكفتة تتشرب من التسبيكة وبعدين أضيف الشوربة ساخنة تاخد غلوتين وانزلها من على النار وجنبها رز ابيض 💙 وبالف هنا
وكل سنة وانتم طيبين ويعود عليكم الايام بكل الخير والسعادة