أيام الحنين
بقلم/إيمان فوزي
أوقات بحس إني زمان
صورة قديمة جوة العين
تاخدني ترجعلي الحنين
أيام ماكنا صغيرين فرحانين
قلب لسة وردي بحلم جميل
يلعب يجري يضحك براحته
كانت محوطاه القلوب تحضنه
تطبطب تدلل تلبي مطالب صغيرة
تحقق أماني وقتها كانت لنا هيه الحياة
تقولنا اطلب مفيش محال ولامستحيل
ولامشغول ولاتعبانين ولاأجلها شوية لبعدين
يااااه كنتم لنا فانوس سحري او علاء الدين
دنيا ملتنا بالأمل من غير ملل عايشين
زمان مكنش فيه غير الأوتوبيس
نجري وسط الزحام ونتشعبط علي الببان
لجل فسحة بعيدة شويتين
يوم عيد نزور ونعيد علي الخلان والجدود
نفرح معاهم ناخد عيدية في شنطنا متستفين
كانوا لنا أهل وأحبة سند جميل هما الأمان
اوعي يادمعة تنزلي دي فرحة قلوبنا بالحنين