كل الدواير محكمة 

كل الدواير محكمة

ياسر بسيوني
كل دوايرك محكمة
وانا دايرتي من غير إطار
ف ازاي عديتي سوري
وقدرتي تبنيلك جدار
كل الحقايق مبهمة
كل أشكال الخداع متلتمة
متمسكنة
مش باين منها غير شعاع الانبهار
كل المشاعر مستسلمة
لا عمرها كانت في يوم متمكنة
زي السفن من غير شراع
لو مرة بس الموج علي يبقى الضياع
لو مرت سلام … يقابلها شط الانهيار
كل الشوارع مظلمة
حتى إشارات المرور
رافضة العبور
رافضة حتى تمدنا بشعاع أمل
وان بعد كل الضلمة دي هنلاقي نور
سلمتلك مدني ….
اصبحتلك مدني ….
فصّلتلك كل شارات القيادة
ذل العبادة
بيمرر كل طعم الانتصار
أعلنت أسري للجميع
هو انا لو بين ضلوعك
هل من الممكن في يوم إني أضيع
ضاعت بعينيك كل تفاصيل الحياه
والموت تاه
على عتبات الانتظار
خريفي مالي الكون ورق وانا بتحرق
مستني مرة تمطري وتطفي روحي
يمكن جروحي
تتلملم لما تلاقيه منك ربيع
….
ياسر بسيوني