ناويين تعملوا ايه يا بتوع السياحة؟

رؤية – اشرف سركيس
بالصلاة على النبى وبالبلدى كده احنا يا بتوع السياحة رايحين على فين والازمة والاحداث السريعة دى واخدانا على فين ؟
وهل ازمة غزة وتطوراتها المتلاحقة هتاثر علينا فعلا وعلى استثمارتنا السياحية ومشاريعنا المستقبلية وتدفقاتنا من العملة الصعبة وعلى الاف العاملين واكل عيشهم ولا هتعدى على خير وهنمكمل فى هدوء وسلام ؟
طب ليه منتعاملش مع الاحداث برقى وانسانيه ونتواجد فى معبر رفح بالاطقم الطبية والمساعدات الانسانية ونورى العالم اد ايه مصر والمصريين متحضرين ومتفاهمين؟
طب ما احنا كمان عندنا فرصة ذهبية لو حسبناها بالعقل كده تركيا فى الشتاء بتقفل من البرد والبق والاكلان مبهدل فرنسا والسياحة فى اسرائيل بخ خلاص – وكمان فى لبنان وتونس معاناة ومفيش اقبال زى الاول – واحنا كمان عندنا ميزة روعة الطقس فى الشتاء والشمس والدفاء وفوق ده كله الامن والامان
طب ليه منركزش على السياحة الروسية ودول الصين وكوريا واليابان والهند ونبدأ فى تسويق الاقصر واسوان والسياحة النيلية خلال الفترة الجاية واهى بعيدة عن الاحداث وكمان نعزم الاتراك اصحاب القرار والشركات الكبيرة ونديهم تسهيلات حقيقة عشان يزودوا طائراتهم للغردقة وشرم ومرسى علم ونملا فنادقها الرائعة ونركز فى الدعايه والترويج على سياحة الغوص والسفارى ونركز كمان اوى على القاهره التاريخية ومزاراتها الاثرية خلال الفترة الجاية
طب ليه منسارعش بافتتاح متحف الحضارات وافتتاح طريق العائلة المقدسة ودعوة بابا الفاتيكان لافتتاحه رسميا وليه مبنشوفش فكره جديده لتسويق الاكتشافات الاثرية ونعزم حد مشهور وله مكانة فى العالم كله عشان يدخل المقبرة المكتشفه بنفسه ويشيل بايده التراب ويفتح التوابيت وننقل الحدث ده لكل العالم ودى هتكون دعاية بمليارات الدولارات بدل ما بنعزم السفراء والصحفيين كل مرة
طب ليه منشوقش العالم ونقول باننا مكملين فى اكتشاف دهاليز الممر والبوابة السحرية الخفية جوه الهرم الاكبر ونعمل اعلان صغير بكل اللغات عشان العالم يتابعنا بشغف ويعرف ان مصر وسياحتها مكملة ومفيش زيها
طب ليه مفيش مرة احتفلنا بالمناسبات الوطنية بتاعة الدول السياحية اللى بتيجى عندنا – ليه فنادق مصر متحتفلش بالعيد الوطنى لالمانيا او انجلترا او ايطاليا مثلا فى كل فنادقها ونعلق اعلامهم ونكون جزء منهم ومن ثقافتهم اليوم ده
ما هو لازم نشتغل ونتحرك ونفكر كلنا سواء ويكون فى سيناريوهات بديلة عشان السياحة تكمل لاما لو قعدنا واتفرجنا على اللى بيحصل ومتحركناش
يبقا عليه العوض ومنه العوض
اللهم قد بلغت اللهم فاشهد