وصيته الاخيرة

بقلم /عماد شاهين
_________
نقلا عن صفحة الأستاذ محمود جنيدي المتوفى اليوم ١٤ نوفمبر٢٠٢٣
قال في وصيته
______
البوست ده هيفضل علي صفحتى لحد
ماأموت ..
• الحقيقة إللى كلنا عارفينها
و متأكدين منها إننا كلنا ربنا كتبلنا إننا نموت فى ميعاد محدد غير معروف لنا ..
وعشان كده أنا كتبت الكلام ده ، لأنى محتاج حاجات معينة تتعمل
وحاجات خايف تتعمل وأنا مش عايز حد يعملها لمجرد إنها معروفة ، ووقتها طبعاً مش هاعرف أقولها لحد لأ ..

• ودي وصيتى :
*************
١) صلاة الجنازة أهم من العزا ، وهى إن كل
ماالعدد زاد كل ما ثوابى يكون أكتر ، فأرجوكم تصلوا عليا .
٢) مش شرط تيجى العزا ، وياريت لو إتعمل فى البيت أو مكان بسيط ويكون القارئان الشيخ كامل الناقة ومحمد الحناوى ، وبفلوسه تطلعولى صدقة جارية أفضل ..
٣) من فضلكم لم يثبت أو يتفق عليه عمل خاتمة قرآن للمتوفى إنها هتوصله ، بس ثابت إن الدعاء والصدقة بيوصلوا للميت ، فرجاء دى بالذات بلاش وإدعولى ، الوقت اللى هتقروا فيه جزء فضوا نفسكم وإقعدوا إدعوا فيه.
٤) بلاش صدقة جارية تقليدية وسهلة ومش مستفاد بيها ، يعنى المصاحف كتير فى مصر اوى وكل بيت فيه كتير ، فممكن نحط الفلوس فى جامع بيتبنى أو كرسى متحرك فى مستشفى يستفيدوا بيه المرضى ، أو دخول مياه لبيت غلابة أو بناء سقف لبيت فقراء ، حاجات ناس تستفيد بيها لمدة طويلة .
٥) دى نقطة مهمة جدا بالنسبالى :
محدش يقول لحد بتعيط عليه ليه ، اومتعيطش عشان هو بيتعذب .!!.
الكلام ده غلط ، والتحذير ورد فى الصراخ والنواح فقط .. انما سيبوهم يعيطوا لحد ما يطلعوا كل الشعور اللى عندهم و مفيش حاج بتقول إن العياط معناه عدم رضا بقضاء ربنا “وأبيضت عيناه من الحزن فهو كظيم” ..
٦) أهم حاجة تانى هى الدعاء والصدقة .
٧) من فضلكم تكثفوا الدعاء وقت نزولى القبر ، أرجوكم . وتتصدقوا بأى حاجة بنية إن ربنا يجعل قبرى روضة من رياض الجنة ويثبتنى عند السؤال ، لأن دة أهم وقت ليا ، وياريت كمان بعد ما تدفنونى تقعدوا معايا شوية ومتستعجلوش تمشوا ، عشان تونسونى فى ليلة زى دى ..

٨) الموت علينا كلنا حق ، وإحنا كلنا أمانات ربنا حيستردنا تانى ، فهونوا على نفسكم الحزن على الفراق بالدعاء ليا عشان أبقى فى سعادة لحد ما أقابلكم تانى ..
٩) اللي بيحبونى يزورونى ويدعولى كتير ، عشان لو مفيش حد بيدعيلى يبقى معناه إنكم نسيتونى وحتحرجونى بين الأموات اللى حواليا ..
١٠) ودى مهمة جدا جدا جدا كمان :
إسألوا على ‏حبايبى على طول وودوهم وخليكوا قريبين منهم ، وشيروا بوستات دينية كتير من صفحتى ، يمكن اللى يقرأ بوست يدعيلى ..

“اللهم إن كثر موت الفجاءة من حولى وكثر موت الشباب غفلة ،
فيارب إن كنت أنا القادم ، فأحسن خاتمتى ويسر طلوع روحى وهوّن عليى سكرات الموت ، فإنى أحب أن ارحل في هدوء وسكينة وطمأنينة ،
ولا تقبض روحي إلا
وأنت راضٍ عنى ، كى اكون عندك ولك مقبولاً وحتى أليق بلقائك العظيم ..
وإن كان لى عمر باق ، فأغفر لى ذنوبى ومعاصى نفسى الأمّارة بالسوء ، واعف عنى وامح كل ما يعرقل طريقى إليك ، وردنى إليك ردّاً جميلاً يارب العالمين ..
ألا هل بلغت ، اللهم فاشهد ..
#محمود_جنيدي